toki pi jan Koele

Est Reading Time: 5 min

toki pi jan Koele. ona li lili pi jan Tapi. ona li jan lawa lon ma tomo Elusalen:

jan Koele li toki: ala mute!

ali li ala mute!

ken la jan li jo e ijo mute.

taso, ona li seme tawa ona?!

kulupu jan li kama li tawa.

tenpo ali la ma li awen.

suno li kama li weka

li tawa tu e ma pi open ona.

kon li tawa nasin wan en nasin tu.

ona li sike.

telo linja ali li tawa telo suli.

taso ona li pini ala.

tenpo ijo la telo linja tawa

e ma pi open ona.

ijo ni li pana e wawa tan jan.

jan ala li ken toki e ali.

oko li awen ala li lukin;

lute li awen ala li kute.

ijo li lon; tenpo weka la ona li lon kin.

ijo sin li ala lon anpa suno!

tenpo ijo la jan li toki:

“o lukin! mi lukin e ijo sin!”

tenpo weka la ona li lon kin.

jan li sona weka e ona.

tenpo kama la jan li sona weka e tenpo ni.

mi jan Koele li jan lawa pi ma Isaeli.

mi kama sona e ali lon anpa suno.

ni li ijo ike!

mi lukin e ali li sona e ni:

ali li ala mute,

li sama e tawa kon.

ijo sike li ken ala linja

ijo sike li ken ala pona.

mi toki e ni:

“jan ali li jo ala e mani;

mi jo e mani mute.

jan ali li jo ala e sona;

mi jo e suna mute.”

sona li pona tawa mi.

taso, nasa li pona kin tawa mi!

mi sona kama e ni:

sona li sama kin e tawa kon.

sona li suli la pilin ike li suli.

mi toki e ni: “mi musi mute!”

taso, ona li ala mute.

mi toki e ni tan musi: “ona li nasa! ona li pona tan seme?”

mi moku e telo nasa ali tan ni: mi sona kama e nasa.

mi sona kama kin e sona.

mi wile sona e ni: nasin seme li pona tawa jan?

mi kama jo e mute li pali e tomo e ma kili.

mi pali e tomo telo mute.

mi esun e mije pali e meli pali

e soweli ali.

jan ante pi ma tomo Elusalen li jo e lili!

mi jo e ali!

mi awen e kiwen jelo

e pona pi jan lawa ante.

mi jo e jan pi kalama musi

e ijo ante mute mute.

mi lukin e ijo la mi jo e ona.

mi pilin e jo mi li sona e ni:

ona li ala mute! ona li lili!

jan lawa pi tenpo kama li jan seme?

mi pilin e sona:

suno li pona; pimeja li ike.

sona li pona; nasa li ike.

taso, jan sona en jan nasa li kama e nasin wan.

pini pi jan nasa li pini mi kin!

mi kama jo e sona tawa seme?

ali li sona weka e jan sona sama jan nasa.

jan sona li moli sama jan nasa.

lon li ike tawa mi tan ni.

mi pilin ike tan mani mi.

mi pana e ona tawa lili mi;

ken la lili mi li jan nasa!

ali pali mi lon anpa suno li ike tawa mi.

tenpo ijo la jan li pali e mute

li pana e ona tawa jan lili ike.

ni li ike.

jan li pali tawa seme?

tenpo suno la ona li pali,

tenpo pimeja la ona li ken ala awen!

ala li suli ante ni:

o moku, o musi.

taso, musi li tan jan sewi suli.

jan sewi li pana e musi tawa jan ijo

li weka e musi tan jan ante.

ni li ala mute kin li sama e tawa kon.

tenpo li lon tawa pali ali.

tenpo pi open lon en tenpo moli;

tenpo kasi en tenpo pi pana kasi;

tenpo pakala en tenpo pona;

tenpo pi telo oko en tenpo musi;

tenpo pi pilin ike en tenpo pi tawa musi;

tenpo pi pana kiwen en tenpo pi jo kiwen;

tenpo pi jo ijo en tenpo pi weka ijo;

tenpo toki en tenpo pi toki ala;

tenpo olin en tenpo pi seli ike;

tenpo utala en tenpo awen.

…mi sona e ni:

pona li lon poka ike;

ike li lon poka pona.

jan sewi li nasin wawa e ike e pona kin.

jan li sama e soweli. soweli en jan li jo kon li moli li sama.

tu li tawa ma.

jan li toki e ni tan seme?

“kon soweli li anpa e ma,

kon jan li sewi e sewi”

o moku, o musi. tenpo kama la seme li lon?

…(9:11)

mi lukin kin e ni lon anpa suno:

jan tawa li nanpa wan ala lon nasin tawa.

jan wawa li nanpa wan ala lon utala.

jan sona li nanpa wan ala lon jo pan.

jan sona li nanpa wan ala lon mani.

… (12:1)

o pilin pona tawa tenpo pi lili sina tan ni!

tenpo lili la sina toki e ni:

“ala li pona tawa mi”.

tenpo lili la suno en mun li pimeja

la jan utala li weka e wawa

la meli lupa li pimeja

la lupa tomo li pini

la kalama pi ilo jan li lili

la kalama waso li weka

la kalama musi li moli.

tenpo ni la jan li tawa tomo pimeja.

jan pi telo oko li lon poka ona.

tenpo lili la linja li pakala

la poki pi kiwen jelo li pakala

la poki telo li pini.

sijelo li tawa ma

sama open ona.

kon li tawa jan sewi.

ona li pana e ona.

jan Koele li toki: ali li ala mute!

toki sin: jan Koele li jan sona

li toki sona e jan ali

li sitelen e toki pona.

toki pi jan sona li sama e kiwen jelo.
jan sewi li pana e ona.

toki kin: lili mi, o sona!

pali lipu li pali pi pini ala.

sona mute li wawa ala tawa sijelo.

tenpo pini la ni li lon:

o suli e jan sewi, o tawa nasin ona.

ni li ali jan.

jan sewi li nasin wawa e ali

e pona e ike.