toki tan lipu pi jan Suansu

Est Reading Time: 3 min

mi kepeken e lipu ni tawa lipu mi.

SOWELI JAN

jan li toki e ni tawa soweli jan:

“tenpo pi suno kama la mi pana e moku pi nanpa wan tawa sina.

tenpo pi suno weka la mi pana e moku pi nanpa tu tawa sina.”

soweli jan li pilin ike tan ni.

tenpo ni la jan li token e ni:

“tenpo pi suno kama la mi pana e moku pi nanpa tu tawa sina.

tenpo pi suno weka la mi pana e moku pi nanpa wan tawa sina.”

soweli jan li pilin pona tan ni.

LUKIN PONA LON

soweli jan li unpa e soweli jan.

soweli pimeja li unpa e soweli pimeja.

jan mute li toki e ni:

“meli ali li ike lukin, meli Mao Sang en meli Li Ki li pona lukin”.

taso, tenpo pi tawa ona la kala en waso en soweli li lukin e ona, li pilin e ni:

ona mute li ike lukin.

kaso li weka e telo;

waso li weka e kon;

soweli li weka e ma kasi

seme li sona e lukin pona lon?

mi pilin e ni:

nasin pona en nasin ike li wan.

mi ken ala tu e ona!

PIPI KON

mi jan Suansu.

mi lape e ni: mi pipi kon. mi tawa kon li pilin pona. mi sona ala e ni:
mi jan Suansu anu pipi kon.

mi lape ala li sona e ni: mi jan Suansu.

tenpo lili la mi sona ala.

ken la mi jan Suansu li lape e ni: mi pipi kon

ken la mi pipi kon li lape e ni: mi jan Suansu

KASI IKE

jan Si li jan pali. tenpo wan la ona li tawa ma Kuan li lukin e kasi palisa.

ona li suli mute mute mute li jo luka mute. sina ken pali e tomo tawa telo kepeken luka wan.

jan Si li jo e jan pali tu. ona li toki:

“tenpo mute la mi tawa monsi e sina. sina pali kepeken kasi palisa mute.

taso, tenpo ni la sina wile ala pali e kasi ni. ni li tan seme?”

jan Si li toki e ona:

“mi pali e tomo tawa telo la tomo li tawa anpa telo.

mi pali e supa la supa li pakala.

mi pali e lupa la pipi li moku e ona.

kasi ni li ike mute.”


tenpo lili la jan Si li lape li lukin e kasi ni.

kasi li toki e ona:

“sina ante e mi en kasi pona, anu seme?

kasi pona li kasi kili li kasi pi lukin pona.

jan li jo e kili pi kasi ni.

jan li pakala e luka ona.

jan li moli e ona.

ona li kasi pona la ona li pilin ike.

tenpo mute la mi sona kama e nasin pi kasi ike.

mi kasi ike. mi pilin pona li lon li suli tan ni.

jan ali li sona e pona pi kasi pona.

jan ala li sona e pona pi kasi ike!”

PONA

jan sona li mute la jan pi jo ike li mute

jan li jo ike e ilo lili la jan ni li moli.

jan li jo ike e ma suli la jan ni li lawa e ona.

pona li lon lupa pi lawa ma.

jan ni li jo ike kin e pona, anu seme?

nanpa li lon li pana e sona lon la jan li jo ike kepeken nanpa.

nasin lawa li lon li pali e pilin lon la jan li jo ike kepeken nasin lawa.

pona li lon li pali e toki lon la jan li jo ike kepeken pona.

KALA

jan Suansu en jan Kusu li awen lon poka pi telo linja Hao.

jan Suansu li toki: “sina lukin ala lukin e kala? ona li tawa telo li tawa sewi li tawa anpa. kala li pilin pona tan ni.”

jan Kusu li toki: “sina kala ala. sina sona e ni tan seme: ona li pilin pona?”

jan Suansu li toki: “sina mi ala. sina sona e ni tan seme: mi sona ala?”

jan Kusu li toki: “mi sina ala. mi sona ala e ni: sina sona anu seme? taso, sina kala ala. sina ken ala sona tan ni.”

jan Suansu li toki: “pona. taso, sina e toki ni: ‘mi sona tan seme?’ sina sona e ni: mi sona. mi sona e pona kala tan ni: mi
awen lon poka pi telo linja Hao.”