jan lawa lili — 10

jan lawa lili li tawa e sike sewi lili mute. ona li wile kama sona.

jan lawa suli li lon sike pi nanpa wan. ona li jo len suli mute li lon supa suli mute.

ona li lukin e jan lili lawa li toki “a! jan noka li kama!”

jan lawa lili li pilin e ni: “tenpo weka la ona li lukin ala e mi. ona li sona e mi kepeken nasin seme?” ona li sona ala e ni: jan lawa suli li pilin e ni: jan ali li jan noka ona.

“o tawa! mi wile lukin pona e sina.” jan lawa suli li pilin pona tan ni: tenpo ni la ona li ken jan lawa e jan ijo.

jan lawa lili li lukin e ni: ona li ken ala pilin e ma kepeken monsi ona. len pi jan lawa suli li pilin e ma ali. jan lawa lili li awen tan ni. ona li toki lape.

“o toki lape ala! ni li ante e nasin lawa.”

jan lawa lili li loje lili. “mi ken ala. mi tawa mute li lape lili.”

“a! o toki lape tan ni! tenpo suli la mi lukin ala e jan pi toki lape. ni li pona tawa mi. o toki lape! ni li toki wawa.”

jan lawa lili li loje suli. “tenpo ni la mi ken ala.”

jan lawa suli li toki “a! mi toki wawa e ante tan ni. tenpo ijo la, o toki lape. tenpo ante la o…”

jan lawa suli li wile e ni: ali li pilin e ni: ona li suli mute. ona li toki wawa la ona li wile e ni: jan li pali e toki lawa ona. taso, ona li jan pona li wile toki lawa e pona taso. ona li toki: “mi toki wawa tawa jan: ‘o lon waso’. jan li pali ala. jan li ike ala; toki wawa mi ike.”

jan lawa lili li toki: “mi ken ala ken pilin e ma kepeken monsi mi?”

“mi toki wawa: o pilin e ma kepeken monsi sina.” jan lawa suli li pana e len ona.

sike ni li lili mute. ni li musi tawa jan lawa lili. “mi ken ala ken toki e ijo?”

“mi toki wawa: o toki.”

“sina wawa e seme?”

“mi wawa e ali.” jan lawa suli li pana e luka tawa sike tawa sike ante tawa sike seli ali.

“sina wawa e ali anu seme?”

“wawa.” ona li jan lawa ali kin.

ni li ijo suli tawa jan lawa lili. jan lawa lili li jo e wawa ni la ona li ken pali e mute. ona li ken lukin e suno weka mute mute. ona li pilin e tomo ona li pilin ike li toki: “mi wile lukin e suno weka. pona, o toki wawa e ni tawa suno: o weka!”

“mi toki wawa e ni tawa jan: o tawa kon e kasi loje sama pipi, o pali e lipu pona mute, o lon akesi jelo laso. jan li pali ala. seme li ike?”

“sina ike.”

“lon. wawa li kama tan sona lon. sina toki wawa e ni tawa jan noka: ‘o tawa e telo suli!’ jan noka li moli e sina. mi ken toki wawa tan ni: mi toki tawa e pona.”

“pona. taso, mi wile e suno weka…”

“mi wile toki wawa e ni. taso, mi mute li awen. tenpo pona pona la suno weka.”

“tenpo seme la mi mute li awen?”

“a..a…tenpo lili mute.”

jan lawa li pilin lape. “mi jo ala e pali lon sike ni. mi weka.”

“a! o weka ala!” jan lawa suli li pilin pona tan ni: ona li jo e jan noka. “mi ken pali e ni: sina jan noka suli!”

“mi jan noka suli pi seme?”

“sina jan noka suli pi nasin wawa!”

“mi nasin wawa e seme? sike ni li jo ala e jan!”

“mi sona ala e ni. mi lukin ala e sike mi ali. tenpo suli la mi lon. mi ken ala tawa mute.”

jan lawa lili li lukin. “mi lukin e ali! sinpin ante li jo ala kin e jan.”

“a! sina nasin wawa e sina tan ni. ali li pona; ni li ike. sina ken nasin wawa pona e sina la sina jan pi sona mute.”

“mi ken nasin wawa e mi lon ma ali!”

“a! mi pilin e ni: sike mi li jo e soweli jaki. tenpo pimeja la ona li kalama. sina nasin wawa e ona. tenpo ijo la sina toki wawa e ni: o moli. tenpo lili la sina toki e ni tawa soweli: sina moli ala. sike mi li jo e soweli wan taso.”

“mi wile ala e toki wawa e ni: o moli. mi tawa.”

“ala.”

jan lawa lili li wile weka li wile ala e ni: jan lawa suli li pilin ike. jan lawa lili li toki: “ken la sina ken toki wawa e ni tawa mi: o tawa.”

jan lawa suli li toki ala. jan lawa lili li weka.

jan lawa suli li toki wawa: “o lon jan pona pi ma ante!”

jan lawa lili li pilin e ni: jan suli li nasa mute.

monsi|sinpin