jan lawa lili li pilin e ike ni li toki: “soweli meli li moku e kasi lili la ona li moku ala moku e kasi loje?”
“soweli meli li moku e kasi ali.”
“ona li moku ala moku e kasi pi luka pakala?”
“moku.”
“luka pakala li pona tawa seme?”
mi sona ala. mi pali e ilo pi tawa kon. pali mi li ike. mi pilin ike tan ni: ken la mi awen e ma ni li jo ala e telo. mi toki e ijo ike: “ona li pona ala! luka pakala li tan ni: kasi loje li ike.”
ona li toki pi pilin ike “ala! kasi li wawa ala li sona lili. ona li pilin e ni: luka pakala mi li ilo utala wawa!”
mi toki ala li pali e ilo mi. ona li toki: “sina pilin ala pilin e…”
“ala! mi pilin ala! mi pali e ijo suli!”
ona li lukin nasa e mi. “ijo suli! sina toki sama e jan suli!”
mi pilin ike tan ni. ona li toki kin: “sina toki e ike!”
ona li pilin e utala. ona li tawa e lawa ona tan poka tawa poka.
“mi sona e sike sewi wan. tenpo ala la jan pi sike ni li lukin e sike seli sewi; li pilin e kasi loje; li olin e jan. ona li pilin taso e nanpa. ona li toki e ni: mi jan suli! mi jan suli! ni li sama e sina! ona li pilin pona mute tan ni. taso, ona li jan ala. ona li kasi jaki!”
“ona li seme?”
“kasi jaki!” sinpin ona li kule ala tan pilin utala.
“tenpo suli mute la kasi loje ali li jo e luka utala. tenpo suli mute la soweli meli ali li moku e ona!
kasi li pali e luka. taso ni li pona ala tawa ona. ni li lili anu seme??! utala pi soweli en kasi li lili anu seme?
nanpa pi jan suli li suli anu seme?
mi sona e kasi loje. ona li wan lon ali. soweli li ken moku e ona la ni li lili anu seme?!
jan li olin e kasi. sike seli sewi pi nanpa mute mute li ike tawa ona; kasi li pona tawa ona. ona li lukin e sewi li pilin e ni: kasi mi li lon sewi wan.
soweli li moku e ona la ni li sama e ni: seli ali li pimeja! a! ni li lili anu seme?!”
ona ken ala toki li telo oko mute. pimeja li lon. mi weka e ilo mi tawa ma. tomo pi tawa kon en lon en moli li lili tawa mi. jan li pilin ike lon sike sewi wan! mi sike e jan lawa lili kepeken luka mi. mi toki: “kasi sina li pona. tenpo lili la mi pali e sitelen pi len uta tawa soweli sina, e sitelen pi tomo tawa kasi sina.” mi sona ala e ni: mi ken toki e seme?
ma pi telo oko li ma nasa…
0 Comments